قصیده للسیده رقیه( راسک الدامی ابطشت) جعفر عبدالمهدی العبادی

بویه بـإخلافک ولونه بالطفوف

ریتک الحال الحرم بعدک تشوف

فزعوا اعله اخیمنه للنهب او سلب

او نارهم خلوهه بخیمنه تشب

کلمن انشوفه مُعادي او لا مُحب

وانته طایح عالثره ابطعن السیوف

نشرد الــلآوین یا بویه او نِــفُر

امنین ما ارکض یجي اگبالي الشمر

شفته راسک چان فوگ اعله السمُر

والخیول ابصدرك اترک او تطوف

انته لمیت الحسك بس کله لا

او من عثرت انصاب وجهي او دمما

او عمري ثلث اسنین شِبت ابکربلا

طفله وینّي او وین تگیید الچفوف

مارعوا حرمت المختار النبي

او مِلخ ترچیتی اللعین الناصبي

او گال خل تمشی رقیه للسبي

بالسبي یابویه شوفونه الحتوف

دخّلونه الکوفه واحنه امربطین

التموا العدوان کلهه امشمتین

او ظلّوا ایسبّون ام الحسنین

او تشتم الکرار کل ذیچ الصفوف

شرد اسولف بویه عن درب الیسر

او یا هضمنه الشام من صاحوا کفر

او گالو اتطبون لازم بالقصر

واللئیم اهناك واتحرسه الألوف

بویه ودونه ابخرایب من نمت

شفتک ابحلمي او علیک آنه اصرخت

واهمه جابوا راسک الدامي ابطشت

وادري اموت اعلیك ما اگدر اشوف

 

جعفر عبدالمهدی العبادی

تمت بحول الله 19 محرم 1444

قصیده لطمیه ( یا لوعتی حمیده ) جعفر عبدالمهدی العبادی

طفله وابوي اریده  یمسح علیه بیده

یا لو عتي حمیده   ما یرجع الراح

بلچي یرد علینه،،،، مشتاگه اله اوحنینه

ما یرجع الراح

 

فیت الابوا  اشکبرهه   منهو یسدد فیّـته

آنه الربیت امدلله   من یسئل اعله ابنیّـته

گالولي رایح للسفر  وآنه انتظرهه جیّـته

لاکنّي أشعر بالیتم طوول أبویّـه ابغیبته

من گلّي لحسین إنتي

مثل رقیّه بنتي   سالت ترا دمعتي

گلبي عَلِي صاح  ما یرجع الراح

طفله او أحن الشوفتک یا بویه مو وکت السفر

ظلمه اللیالي ابغیبتك بویه ابسمانه انته الگمر

یا ریته مطرش السمع یاریته معمیه النظر

حت لا اشوف الناعیه  او لا اسمع آنه ابهالخبر

یصعب یبویه لفراگ

جمر المصیبه حرّاگ  شب الامل والاشواگ

مکسورت اجناح  ما یرجع الراح

 

یا بویه نمشی الکربله هل کوفه ما هي امرتبه

تدعي السبط واتخاذله او من هالرزیه اتشیبه

وابن الزچیه الطاهره  من دم جبینه اتخضبه

واتهد عله اخیام النبي او کلشی اللي عدنه اتسلبه

واسمعت الحسین ایگول

تسحگ علیه الخیول  صوب الخیم تالی اتجول

واتبدي النیاح    ما یرجع الراح

 

اول رزیه امصیبتك  یا بویه حلّت بیّه

وامتدت الحد کربله حد ما رحت مسبیه

واختی الحنونه  بالسبي ماتت ترا رقیه

محتاره ضلّت عمتي تبچي ابخفه الابیه

یابویه ماتدری الشام

شمات اجونه او ظلام  ما یرحمون الایتام

یا عمق الجراح ما یرجع الراح

 

الشاعر جعفر عبدالمهدی العبادی

قصیده لطمه ( آیا رقیه او یا هضم دور الشام) جعفر عبدالمهدی العبادی

آ یا رقیه او یا هظم دور الشام

عگب الدلال اعله الترب کون اتنام

آ یا رقیه   آیا رقیه  آ یا رقیه

 

ویلی علیچ امن الدرب   حر او یشبعونچ ضرب

   آآ یالسبیّه

کلهم یعرفون الطفل    ما تحمل ایدینه الحبل

   واسیاط امیّه

طفله او زغیره بالعمر   حافي یمشوهه الظهر

جمره الوطیه

من کربلا ابحبل السبي   وایتل حبلهه الناصبي

آآ یا رقیه

ابدرب السبي اشحال الیتیمه

ابظهر الحمر ما عدهه خیمه

آ یا رقیه   آیا رقیه  آ یا رقیه

 

آه او الف آه السبی     زیّد عله امصاب النبي

درب السبایه

ویلی رقیه من مشت   سوط اضربوهه لو بچت

وَلدِ الدعایه

لو بابا گالت یاخلگ   حادي الضعن یاخذهه طگ

وابلا حمایه

طفله او زغیره ابلاذنب    لیش التراچي تنسلب

یهل الدرایه

ذان الطفل ما تحمل الجر

والدم تراهوا اعله الارض خر

آ یا رقیه   آیا رقیه  آ یا رقیه

 

من طبن الکوفه اشلگن     بحجار ایصیبون الضعن

وایصیبوهن

زینب تلم لم بل حرم   لا خیمه عدهن لا علم

وایسلبوهن

راس الحسین اعله الرمح    یرمونه من فوگ السطح

وایروعوهن

  صاحوا علیهن رافضه      شتموا علینه المرتضی   

وایشتموهن

صاحن یحیدر ما تجینه

عوف القري لحّگ علینه

آ یا رقیه   آیا رقیه  آ یا رقیه

 

زین العباد الجامعه    چانت ثجیله اتلوعه

واتسیل ال ادما

گعدت رقیه او ناشدت    صاحت یبویه اهیه اوبچت

وین آنه الگا

گالوله سکتهه العدوا     طفله او تنادی اعله الابوا

یا ویلی ویلا

نادتله  وابگلب الجریح    جابوا لها راس الذبیح

ای وا حسینا

یبست شفاهه امن البچی

ماتت رقیه ابلا حچی

آ یا رقیه   آیا رقیه  آ یا رقیه

 

 

جعفر عبدالمهدی العبادی

قصیده لطمیه وایظا نعي للسیده رقیه س{طفلة احسین الشفیه} جعفر عبدالمهدی العبادی

قصیده لطمیه وایظا للنعي بکمال الحزن للسیده رقیه سلام الله علیها

********/**

طفلة احسین  الشفیه نادت او صاحت یبابا

من کثر ضجهه او بچیهه ماتت ابّطن الخرابا

*******/**

صاحت العمتهه زینب عمّه  وین   البابا  وینه

ملخوا  الترچیّه    منّي    والسرق شتّم عَلینه

وإصرخت دلحگ یبویه چنّه ما یسمع یجینه

شبّوا اخیمنه او شردنه ما اجت لینه الگرابا

********/**

وسطت  البیده   رکضنه  والثیاب امحرگات

صحنّه مای انرید عمّي منعوا اعلینه الفرات

عمّی السجاد   ایدینه   بالغیود  امگیدات

سبعت اشواط ارکضتهن یطلع ابشانی سرابا

*************//*

جمعو اطفال الهواشم بل حِبال  او  ربطونه

گالو ابناء الخوارج بل سیاط اهمه  إضربونه

صحنه یا عباس وینک عمّی دلحگ لوعونه

ما سمع صوت الیتامه اومارجع عمّه جوابا

*********/**

تالي یسرونه او مشینه والیسر صعبه علیّه

صحت إله یحسین بویه آنه إبنیتک رقیّه

ماتجي   واتشوف  حالي طفلتک بویه إبأذیه

سمعوا ابچاها النواصب گالو انجیب الهه بابا

*********/**

جابو الراس الطفلةِ  والطشت ذبّوا   علیهه

لطمت او ناحت حزینه حنّت او گامت لابیهه

لزمت الراس او تشمّه ماتت اعلیه من بچیهه

آه یا زینب غریبه  فگدت الطفله  المصابا

**********/**

الشاعر جعفر عبدالمهدی العبادی