ابوذیه (مرهفانی) جعفر عبدالمهدی العبادی

الوکت هفیته مرّه مرهفانی

تمر الدنیه لکن مرهفانی

لبوصالح اصیرن مرهفانی

واکون ابیمنة الحگ عالردیه

 

جعفر عبدالمهدی العبادی

قصیده عمودیه ( یالبگلبک حچی طلعهن ابساع) جعفر عبدالمهدی العبادی

 

 

یالبگلبک حچی طلعهن ابساع

نعم تتلگّا کلشی امن السمه الگاع

تشیل اصدورنه اشما عندک اهموم

یعمي اگلوبنه ابگد الفضا اوساع

عرس عدنه النزال او صکّت البیض

ندوس ابلیل ضلمه ابلبوة اسباع

نِحن اعله الربع حَن المفجدات

صعب حاتم یگول امن ابتعد باع

یصعب  هجر  خلانی  تراباع

الابوذیه الحاتم خلیل العبادی

علیه  اوحبهُم  ابگلبی تراباع

الطیب یشتری اخوانه تراباع

لجلهُم نفسه لن ذاته وفیه

نصاحب کلهه کل واحد إله انجاز

الفضل یرجع لمن یعدل بالاطباع

ابد ماعدنه غیبه او ذم الاشخاص

فرق بین الاسد لابین الضباع

مشینه احنه ابدرب مشانه لاسلام

حملنه اشگد مصایب وایظا اوجاع

لچنّه امچلبین ابچف ابوحسین

الیهد چفّه تراهوا امن الشمل ضاع

یطب حتما جهنم کلمن ایعوف

تعال اسئلنه وانجاوب بالإقناع

علم کل الخلگ مایسوه فلسین

علوم آل النبی البس بیهن انفاع

بحر هالدنیه واتغرگ السفیناة

سفینة منجه وایظا هُمّه الشراع

اذا حاجه الك تطلب من الله

شرط بیهم الآهک ما یرد داع

بدع بالخلقه ربك من خلق نور

مُحمد وآله واتفنن بالإبداع

 

جعفر عبدالمهدی العبادی

قصیده عمودیه ( انته ابونه ابهالزمن) جعفر عبدالمهدی العبادی

ابطولِة الغیبه الخصم گامت تجول

تقتل او تنهب تراهي ابکل بلد

والعرب مدت لها اچفوف السلام

تحسب الحسبات   واتعد ابعدد

والشعب ملتهیه هذه او لوله ذاک

والعهد یالمهدی چن منسی العهد

چن نسوا بیك ارتفع قدر الجمیع

صیت اهل لاسلام من صیتک صعد

والقلیل الواعیه التتبع خُطـٰاک

تعرف ابجیتك یجی الکل السعد

والبقیه اتصفگ الکلمن یصیر

عالمسلمین الحکم  گالوا  مدد

تالي ما تالي یبوگ اشماکو خیر

حتی خله الخیر من عدنه شرد

هیکلة لاسلام ماتت من زمان

بادن العظمات وانطش الجسد

راح ویه الریح هب اویا الهوا

ما لگینه آثار وکت اللي خمد

چان ابو المله علي او طاها الرسول

وانته ابونه ابالهزمن وانته السند

انته لولاک التشیّع راح ایموت

نحتسب لحضات کم او کم بعد

یمته نسمع صیحه من بطن السما

جبرئیل ایصیح هآذه المهدي رد

حتی کلمن مخلص الشخصک یجیک

لا یهمه الصیت لا مال او ولد

وانته تحیی المات واترجع اللي ضاع

او کلهه تصرخ دیننه ابییته انولد

والزچیه اتصیح یا ثار اضلوع

توه احس گلبي یبوصالح برد

 

جعفر عبدالمهدی العبادی

ومضه ( لاتعمه امن الگلب) جعفر عبدالمهدی العبادی

لاتعمه امن الگلب خل تعمه لعیون

فرق اهل  البصر و اهل البصیره

 

فرق بین الملکهه او شیید اقصور

فرق بین الیبیت عالحصیره

 

فرق بین الیدِل طُرق السماوت

فرق بین الطلع ضییع مسیره

 

فرق بین الیدوس اعله البُطل حیل

فرق بین الیرك یسحگ ضمیره

 

فرق بین الیزید اتأممر اعلیه

فرق بین الحسین اصبح امیره

 

جعفر عبدالمهدی العبادی

قصیده عمودیه ( آنه اول واح اگبالک اطیح) جعفر عبدالمهدی العبادی

آنه اول واحد اگبالک اطیح

یاهو گال ابیوم تظهر مانهد

عندک العباس الك عابس نکون

ذبنه صوب الموت نفزع مانرد

واحنه تربیت الکفیل الهیچی یوم

عالامام اندافع الگطع الزند

شیعه من فتوت شخص مرجع تثور

واهیه  بگبال الخصم توگف حشد

حتی المترّف طلع یوم القتال

گال لجل الدین اموتن مستعد

انته یا ثار الذبیح ابکربلا

انته یا ثار الزچیه المُعتمد

کافی بس اتگول واتأشر قیام

ینگلب سیف الیمثلونه ابورد

ینگلب طاعون جیش الانتقام

نحصد العدوان یالمهدي حصد

سل فقارك والمعارك گبهه نار

کالامیر اطردهم ابسیفك طرد

ثورتك للصین وابعد هم تروح

حد مکان الماکو منّه ابعد بُعد

وانشر اسلام الصحیح اعله البلاد

او فوج فوج الناس تدخل مو فرد

 

جعفر عبدالمهدی العبادی

ابوذیه (کربلا حسین) جعفر عبدالمهدی العبادی

وحگ الچان کاشف کربلاحسین

اشتگول احسین ماکر کربلا حسین

 لزمهه ابچفه غاضب کربلا حسین

  الو ماالله طگهه اعله الثریه

 

جعفر عبدالمهدی العبادی

ابوذیه ( جن بالحسین) جعفر عبدالمهدی العبادی

وحگ من گال بالطف جن بالحسین

امل کل شیعی گبره جنب الحسین

 غیر ابوالیمه جهنم جن بالحسین

تطب لو یشفع احسین الشفیه

 

جعفر عبدالمهدی العبادی

قصیده للعباس ( انه اخو الطاعن) جعفر عبدالمهدی العبادی

آنه اخو الطاعن جملکم بالنزال

چنتم اتحرسونه وانتم بالالوف

قط ابو محمد اخوی آنه الچبیر

شکه رمحه او ما رجف من السیوف

والچفوف التلزم ازمامه او ترید

لا یصل لیه الحسن والکل تشوف

سیفه جره او گطّع اشما چف لئیم

والخصم دلاهم الموت المخوف

ضل یکبّر حیدره السبط الرسول

یا حی الله اب ابني گطّاع الچفوف

ذاکه یومه او سجّله التاریخ اوضل

وآنه یومي الیوم نووال الحتوف

فرّق احزاب الکفر حیدر ابوی

من اهد الیوم افرقهه الصفوف

وآنه سبع الگنطرات ابنهروان

کیفی اشگ الجیش وابکیفی اروف

کیفی اصولن یمنه لو اروحن شمال

للفرات اوصل وادوسنهه الانوف

خاطف الارواح طبعا عزرئیل

لکن ابهل وادي بس آنه الخطوف

کعبة الاحرار ابوالسجاد اخوی

ینجه بس الچان عالکعبه یطوف

آنه عباس الگمر وازماطه دوم

راح اشیل ابچفی واگلبهه الطفوف

 

جعفر عبدالمهدی العبادی

هوسه للکاظم ( للحاجه باب ) جعفر عبدالمهدی العبادی

الحاجه لو صعبت یصاحب والخلگ  مترد جواب

راح اوجهک صوب واحد  ینعرف  لـلـحاجه باب

موسی بن جعفر تگصده هذه مای او مو سراب

والکاظم حتما یگضیهه

 

                              جعفر عبدالمهدی العبادی

قصیده عمودیه وصل وکت الحچی( للسجاد ع) جعفر عبدالمهدی العبادی

خلص دور السیوف او طعن الرماح

     وصل وکت الحچي  واسوالف اکبار

صدر مجلس لون تتکلم اشیوخ

      تضل سکته او بعد ما تحچی الزغار

ابو الباقر لمن یتکلم اشلون

      صعد  یخطب علیهم والملأ  احتار

علي السجاد آنه او زین العباد

     أنه ابن البلحرب بیکم شعل نار

أنه ابن الما یکع والکل یکعون

   لون هد اعله خصمه اوبیده فقار

أنه ابن المارجف والجن یرجفون

  انه ابن الحیدر المعروف کرار

محمد جدی مو جدک یملعون

    أنا ابن احمد مُحمّد جدي مختار

دَنَى فَتَدَلَّى فَكانَ قابَ قَوْسَيْنِ أَوْ أَدْنى

دُنُوّاً وَاقْتِراباً مِنَ العَلِيِّ الأَعْلى

أنه ابن اللاح البراق او صعد فوگ

     وصل حد العرش للباری من زار

أنه ابن الفاطمه او امک هند روح

   انه ابن الخیره  وانته ابن الرکب عار

لنا الحمزه التعرفه ابصید السباع

           اسد الله  اسدنه الصار طیار

الحسن عمي الکریم البي یمدحون

       لَبد ما سد مضیفه اگبال خطار

أنه العباس عمي او اسئل الناس

       علیهـ اتسولف الوادم لمن غار

گِلب لون النهار او صار چن لیل

    گِلب لون الیالی او صارت انهار

 الو ما رادت الله او چان دستور

       علیّه امن الطفوف اتسولف اخبار

لون یأذنلی ربی او احمل السیف

    لکان اسمک محیته او صار ماصار

أنا ابن الضامی والمذبوح عطشان

       عله الرمضاء طایح والوکت حار

تدوسه اهل النفاق ابحافر الخیل

      عله العسّال راسه ابکل بلد دار

نساء آل النبي الکلهن اسیرات

       خواتی اوعمتی الصابوهن احجار

نِبات احنه ابخرایب واحنه لملوک

        لچنّه احرار احنه او نبگه لأحرار

 

 

جعفر عبدالمهدی العبادی