ما نخیتک یا علی ابوکت الصعاب
إلّه والکلفات گاضیهن اکید
واعرفك يابو الحسن یابوالحُسين
كلشي بيدك ينفتح مامن شديد
یا من المختار زامط خصمه بیك
إطلع المرحب او گص منه الورید
او حصن خیبر فلشه بیدك
بابه شلعه او ذبه فوگ اعله الصعید
انته صیتك عالي ما فوق المقال
منفرد تاریخ الك واحد فريد
انته گضّاي الحوائج لليريد
واليجيك اتليّن ابشانه الحديد
والله لو ايدي لو تدگ باب الخصیم
راح أگصهه او ما اریدن هیچی إيد
جعفر عبدالمهدی العبادی
وحگ اللی خلقنی ونتهانی
ادور اعلیک خارج ونتهانی
لوّن ما ترجع اخلص ونتهاني
ك نخله ابصف نهر منهوب ميّه
يمن طه النبي يهديب وصلاك
نريد الملتقي وانريد وصلاك
وکت تظهر اجيك ازحوف وصلاك
واموت الخدمتك يبن الزچیه
النفط والگاز والجیعان ولما
بسمهن حصلوا العدوان ولما
یردونه نعوف احسین ولما
تحس عافت علي بسم القضیه
سيفك عاليضد الدين سل في
خويك لو گطع ویاك سل في
إگصده او صوّر انته اوياه سلفي
تضل تذكار لليذكر خويّه
جعفر عبدالمهدی العبادی
آنه ابن الجمّع خوانه
او لو سییر یگصدهم کلهم
چنت ازغییر واذکر نطلع
وانسافر وانروح الحیهم
عبادان او نمشی الگصبه
او نوب الرامز وانعایدهم
کثره ادیار او ما عددهن
بیهن اهلی او کلهه اندلهم
حنّییت والدنه اتبچی
فقرا البیهم کلهه ایعدهم
کل یوم ایوصنی ابگومی
یابویه اهلک بعدی اتمرهم
والطایح کون اتّچیله
والجرحه اتصیر انته المرهم
یا جعفر یا بویه اتعلّم
غیّض نفسک لا اتزعلهم
چف واحد ما یصفج گلّی
بالک فد یوم اتطشرهم
مثل اهلک ما یحصل بویه
او للکلفات ایکون اتلِمهُم
علمنی او ختمیت ادروسه
او انطی الروح الخیر او شرهم
گلالی الجنه ابچف حیدر
وابچف فاطم لا تترکهم
علمنی او ربانی احسینی
او اهل البیت ایکون اخدمهم
او علمنی ابعاشور اتحزم
واخدم کل واحد یگصدهم
#عبدالمهدی
جعفر خلیل العبادی
یا محمد یا رسول الله البخیت
اتشوّر ابکلمن یسیئك لو غلط
وانته ابو گلب الحنین الکله طیب
اتسامح الیتعذرک لو ذنبه شط
انته نور الباري من زاح الظلام
الحط عله الاحرُف مكانات النقط
اعرف الحق تعرف اهله امبينين
انته اهله او كلمن اوياك اختلط
صار نفسك من قبل رب الكريم
او غيره ما يقبل احد لا والله قط
انته بينت الصراط المستقيم
او گلت هذه الدرب درب الله خط
او رادو ایزلقونك اب ابصارهم
علانهه او فلتانهه وافلاني نط
لكن الراده يصير ابكن يكون
غصبن اعليهم علي الاول فقط
جعفر عبدالمهدی العبادی
حافی من بیتی عله اجدامی اروح
بلچی ادرک ذره من ظیم العلیل
خلی رجلینی یچویهه التراب
اوتحرگ ابویهی شمس الله الجلیل
ماکو برگبتي سنسله امن الحدید
او سوط ما ینطگ علیٰ جسمي النحیل
او لا شماته او لا شتایم بلطریق
او لا سبایه اویای تصرخ یا کفیل
او لا طفل کل ساعه من ناگه یطیح
او بین چم یوم او یگع واحد چتیل
او لا ایحطّونه ابخرایب راس ابوی
وختي اتموت اعله راسه امن العویل
وآنه عماتي ولا تنطگ سیاط
او لاهن امرکبینهن فوگ الهزیل
عمي خلوني ابهوای اشما نویت
وارد ازور احسین شدیت الرحیل
ماتشوف اهل المواکب بالمسیر
یاهله ابزواره والمدمع یسیل
عندي کون اتبات یامن لیه اجیت
لو ولو لحظه تضل تگعد قلیل
اعرف ابقدرک یزایر للحسین
انته طالع گاصد الاعظم سبیل
تنمحي کل خطوه منّک سیأت
والمحاسن تنکتبلک بالبدیل
یحضرک وکت الممات او بالورود
اوراح یجزی لک تره ابخیر الجزیل
جعفر عبدالمهدی العبادی
الــــــــــــــفیّةُ عَبدُالمَهدي
الألف أحمد نبینه المصطفی بیّن الإسلام کلّه او عرّفه
الباء بالكرار الإسلام اعتله یعنی من دونه الصحابه امبهذله
حیدر إبشخصه نِعرف المرجله اي علی الکرار صوت الماخفه
التاء تالي ایرید إله بالتضحیات فاطمه الوگفت تدافع للممات
وهیه قدوه اتکون للنسوه الاُبات وإبأمر منهه الگبر هم اختفه
الثاء ثللم سیف کل واحد وکح والحسن فاز ابصموده او بالصلح
یعني شک ابگلب کل حاقد رمح او بالکرم لساعه شاهد موقفه
الجیم جاهد في جهاد الموت أکید یستقام الدین لو یفضح یزید
ضحّه بأهله او صحبته وأصبح شهید یا مناضل یشبه إحسین ابطفه
الحاء حنّه ابعاشر احسین الظهر حیث منه ایروح عباس الگمر
حامل الوائه او یطیح إعله النهر هذه لمصاب اللي یگطع کل گفه
الخاء خدّر هامت ابوسط الفله آه منچ آه یا کرب او بله
یسّروا آل الوصي عقد الوله لارحم عدهم ولا اي عاطفه
الدال دخلوا بلسبایه ابکل بلاد طبّوا الشام او أیادیهم گیاد
والشماته تشمت ابزین العباد باتوا اهناک ابخرابه او من قفه
الذال ذاک ایزید سفّاک الدما هذه ابوالباقرابن خیر الوری
من صعد لاعواد یخطب بالملا آنه ابن مکه او منا ویّه الصفا
الراء رادو یمنعوا من الحچي حوّل الافراح لاکن بالبچي
چان بالگید او عله أعصاته اموچي رعّب إبگلب الرذیله او خوّفه
الزاء زاروا من بعد رد الضعین وانعرف للیوم یوم الاربعین
توجب الجنّه لِمن زار الحُسین لکن إزیاره إبتمام المعرفه
السین سائل ما یرد اله ابجواب هذه ابوالصادق مفسّر للکتاب
کلهه تعرف باقر اعلوم الصعاب وابدلیل الخاطی بالحد وگفه
الشین شربینه محبتهم شرب من معین الصادق الصافي العذب
مذهبه الحق او ثبت ذاکن چذب واللي تتبعهم اُناس امخرّفه
الصاد صادِق بالکلام الاب او جد او بالعلم یتفایض او لا ماله حد
حصنه واسع والیطبّه ابشانه سد یحفظه امن النار عن لا تلقفه
الضاد ضِدهم صار کل طاغی رجیم والله شاهد ما اقولنه او علیم
ینسجن لیش العمد موسی الکظیم وإنقتل بسموم شیخ الطائفه
الطاء طئطء کل شوامخ من رؤس الملحدین او کل دیانه اویه المجوس
کلهه طخّت من نطق شمس الشموس بین الدین ابتمامه او وصّفه
الظاء ظهرت ظاهره ابکل البلاد معجزات الوالی امحمد جواد
ینعرف بین الخلگ باب المراد او وسّم الدین ابوسامه او شرفه
العین عدّل ؛رتب اوصفه الامور او شهدت ابشأنه علی مر الدهور
شُبهه للشیعه کشفهه ابن الطهور بي غدت للیوم هیچ اموالفه
الغین غارت حسدت الشیعه الانام حیث مثل الهادی ما عدهم امام
آذوا ابن الطیّب اولاد الحرام محیی چان الدین الله او مصحفه
الفاء فهّم ماهوّهَ معنی الهُداة بالزیاره الجامعه اتشوف الصفات
هذه شیّ الدوم یرعبهه الطغاة ما ترید الناس تمشي إمثقفه
القاف قالوا للحسن بأمر اللعین لا تهیّج الناس واتزور الحسین
واهوا گال الزار یوم الاربعین بي صفات المؤمن او محله الصفه
الکاف كافي امن الجهل يهل الجهل بيد دوله الكافره المولىَ انقتل
والبقه واحد بعد من هل أهل غاب عن انظارنه او عنّه انخفه
اللام لامونه اشکثر لمحبته واحنه نبگه او نفتخر چ شیعته
ما نخاف امن الخصیم اشما فته خله یشفی اغلیله وایگول اشتفه
المیم ما یحتاج اسولف بالعتاب المهدی مثل الشیعه آذاه الغیاب
الچم نفر رکضینه بس طلعوا سراب اله مسحت چفه وانحصل الشفه
النون نوّر نوره بگلیب المحب والنفع مثل الشمس خلف السحب
والیحبه الوصله ما تحجب حجب والجمیع اتشوفه لو سل مرهفه
الهاء هادینه لون یظهر اکید ننزع اثیاب السمل نلبس جدید
ذاک یوم ابلا تقیه او عدنه عید والخصم تبگه حیاره امصفصفه
الواو ویله الچان حاقد عالنبی یذبح ایفجّر یشتّم مذهبی
انگله جاک الیوم مهدي العربي قائد الامه العضيمه المُشرفه
الیاء یا میت هله اتصیح البشر بالامام المنجي مهدي المنتظر
ثار ضلع امك نريده امن الكسَر او ثار جد المنذبح من القفه
جعفر عبدالمهدی العبادی
مجنونه شیعة حيدره بحسين مجنونه
ذبوهه عل موت الجدم والخطر يمشونه
ما ننمنع هیهات
منذوره هالرگبات
تفجير داعش ما منع ما تمنع اكرونه
کف لومتک یا ناصبی ونته ارجع الدارك
خلینی بفکاری ولک خلیهن افکارك
یا أيها الكافر بعد ما تشتعل نارك
صحناله يحسين الأبي كل عام زوارك
لو ضدنه كل الناس
موعدنا للعباس
مجنونه شیعة حيدره بحسين مجنونه
هل عام يفرق يختلف عن باقي لعوام
هل عام حجتهم وبا يردونه ننظام
وحيات ذاك اللي انقتل ما تمم اصيام
مجلس عزانه مستمر لو تمطر اسهام
ما ينگطع هالصوت
لحسین حد الموت
مجنونه شیعة حيدره بحسين مجنونه
وطلابتي ويّه الذي محسوب عالشيعه
لو ويّه قاتل فاطمه لو ويّه الوديعه
لو توگف ابصف حرمله واشما اُمر طیعه
لو نادي لبيك علي واعلن إله البیعه
بين مصيرك وین
لبيك نادي احسين
مجنونه شیعة حيدره بحسين مجنونه
يوم المعاد او بالحشر خالیه إل إیدین
باچر املاگه اویه الوصی والعین بالعین
شتجاوب انته الحیدره لو یسئلک زین
شتگله خفت امن الوبا محضرت لحسین
باچر تضل محتار
شتجاوب الکرار
مجنونه شیعة حيدره بحسين مجنونه
مجلس عزاهم بي شفه ما تبگه علّه
واحسین یا درب العدل للعنده زَله
لو تدری چم تایه هِده وال الله دله
هیهات ناده ابکربله وأرفض الذله
ناده الحُسین ابصوت
یا محله عندی الموت
مجنونه شیعة حيدره بحسين مجنونه
الشاعر جعفر عبدالمهدی العبادی
كلنه انصيح ابعالي الصوت ابعالي الصوت
لجل إحسين اشمحله الموت اشمحله الموت
يهوانه اللي عشنه ابحبه او يالعايش بالروح
محلات المشايه ابدربه من نطلع وانروح
لا ماتصعب عدنه الصعبه وِنطِي كل السوح
نتذكر لوعات الغربه نبچیلک واننوح
یا نور الباري الجبار يا ضنوة طه المختار
يحسين ابحبك وإنفوت كلنه انصيح ابعالي الصوت ابعالي الصوت
بأيامك نذرفهه الدمعه تستاهل دمعات
بيهه انواسي أُمنه البضعه بأحزان او لوعات
والناعي لو ضل لك ينعه نرفعهه الونات
كل الدنيه ايكون اتسمعه لحسين الاصوات
ما ردنه الغير او ردناك خلّسنه الكون ابطرواك
خليناهم كلهه إسكوت كلنه انصيح ابعالي الصوت ابعالي الصوت
شافونه العالم واتحدوا گالوا لا تمشون
مشايه اعله الموت اتعدوا طفنه الچم ملیون
احنه الزدنه او همّه اتبدوا خلهم خي ايفجرون
والشیعه اسیوف الهم حدوا والکل ینتظرون
خدّامه او خدّام الزهرا والمهدی المشایه اتنصره
والكافر يبگه المبهوت كلنه انصيح ابعالي الصوت ابعالي الصوت
طبعا نفدی الروح ابشانه او خصمه النتحدّي
حب احسین الیجری اویانه ابدمنه النتفدّي
یستاهل نرخصله إدمانه او نرخص للمهدي
ارفع چفی او اصرخ آنه الغیرک ما عندي
ما میل الغیرک مولانه انته الکوثر وانته امیانه
عالعالم مولى المثبوت كلنه انصيح ابعالي الصوت ابعالي الصوت
جعفر عبدالمهدي العبادي
من ابو فاضل عله الحومه نزل
لا تسئلونی علیهه اشگد چتل
ناس بالناس ابرکضهه اتردمت
واللي طاحت للممات اتقدمت
يعني تحت الحافر إهيه اتعدمت
ما يِحَصل اجواب عل موته السئل
ما یحصل اجواب طبعا بالطبع
درعم ابوسط المعاره ابلادرع
سیفه ما جرّه او تولاهم صگع
والیصگعه اهناکه بمکانه انشتل
والیصگعه اهناکه بمکانه انعدم
من بعید اعضیده عاین وابتسم
اي كفو العباس شیّال العلم
واخته صاحت یاهله ابزود الکفل
وإخته صاحت ياهله ابموت الرجاس
يرعد او تمطر عله الجيش النُحاس
حتى ملك الموت كضّاه الحماس
يقبض الارواح مو مفرد جُمل
یقبض الارواح مو مفرد عدد
والجموع امن الخصم صارت بدد
صاح جبرائیل وابصوته شهد
لا فتیَ الّا علي وابنه الفحل
جعفر عبدالمهدی العبادی
صاح ألا من ناصرٍ يحمينه
وحده حاير والعده امحوطينه
وحده حاير والعده شبه الدبيب
يا زهير ايصيح مرّه او ياحبيب
ماكو بل انصار اله واحد مجيب
والبَطل یم النهر چفینه
والبطل یم النهر طایح وذر
صاح وسفه اعلیك عباس الگمر
انته نور اعیونی یا ماي النظر
ليش نايم والعده تولينه
لیش نایم والعده اخلافک زلم
زاد بیهم خویه یا خویه العزم
وآنه حیلي اعليك كامل منهدم
واحنه من دونك تره اتعذبينه
صاح زينب جهزي الميمون الي
لاچن ابیاحال ابن حیدر علي
اتگله من بعدك نضل ابلا ولي
گلهه امر الله وامنفذینه
تالي من لاح المهر بيهه انحدر
ضامي چان احسین وانزل عالنهر
من غرف یشرب ینادونه ابخبر
الحگ اخیامک تره امحرگینه
ذبه من چفه او رجع صوب الخیم
ثاري خدعه امن الخصم بيهه افتهم
طفله یابه او گال وین اهل الشیم
شنهو ذنبه وانتم امعطشینه
جعفر عبدالمهدی العبادی
