قصیده جلوه (علی یا علی علی) جعفر عبدالمهدی العبادی

#قصیده_جلوه

 

 

علي یا علي علي علي

علي یا علي علي علي

یا امیر المومنین المرتضی علي علي

انته یا حصن الحصین امن اللضي  علي علي

بالحشر انته شفیع الرافضه علي علي

یا علي نادینه

بالحشر تنجینه

یا امام الاولي  علي یا علي علي علي

 

یا من ابکل عرکه شرّدت الزلم علي علي

الله گال ابکیفک اتطش او تلم علي علي

بیدک الصک یا علي او راعي الختم علي علي

حبک الربانه

یا علی مولانه

 انته صوت المعتلي   علي یا علي علي علي

 

منهو غیرک طیّح اصنام الجهل علي علي

وابغدیر الدین بوجوده اکتمل علي علي

صاح ابوالقاسم علي خیر العمل علي علي

والعهد للشیعه

بالغدیر البیعه

للنبي صحنه بلي  علي یاعلي علي علي

 

علي یحزام النبي ابکل الشدد علي علي

لو نطیح ابمشکله انصیح المدد علي علي

للنوایب انته حلّال العُقد علي علي

للممات اویاکم

یا علي نهواکم

یا بعد ناسی او هلی علي یا علي علي علي

 

 

جعفر عبدالمهدی العبادی

ابوذیه ( شل عاب ) جعفر عبدالمهدی العبادی

 

تعیّب ها یشامت ولك شل عاب

عله جسم اللي من الظیم شل عاب

العب عـود تالي الـعمر شـل عاب

ونه عمري خلص کله ابأذیه

 

جعفر عبدالمهدی العبادی

ابوذیات (لاشین . شنه) جعفر عبدالمهدی وحمزه السلامی

 

مجارات ابوذیات عبدالمهدی وحمزه

یریت اعظام اهل الفتن لاشین

ابد ما حاچي عنک سوء لاشین

لما؟ شخصك عَلِي لاغار لاشین

حرب من حاطت العدوان بیّه

 

جعفر عبدالمهدی العبادی

 

يوم الواشي صوبك حرب شنّه

افزعت فزعة زلم ما گلت شنّه

 فخر یکفینه لیك اوداد شنّه

و خاويناك چی ذاتك وفيه

حمزه السلامی

هوسات نصیحه (الغیبه والموت ) جعفر عبدالمهدی العبادی

صیر السند للخوان والزالف عالدرب یبه

اشد  من الزناء اتکون   الله  ایگول عالغیبه

بدل ما تحچی شین الناس سولف دوم بالطیبه

والخیّر ما ذم إبناسه

 

یل عندک ذنوب اهوای  واتحمّل  علیهه اذنوب

هم تدري  الاجل یا ساع؟ ما حان  الوکت واتّوب؟

 چم  واحد ینام الیل  ما فز  الصبح هنوب

  ما یصبر ساعه،، والموت

 

جعفر عبدالمهدی العبادی

هوسه للحسین ع ( انته سر الوجود) جعفر عبدالمهدی العبادی

 

انته یا سر الوجود  والعگل تایه الك

وانته قطب الدنیه کلهه البیك یندار الفلك

ضامي تصبح یشفیه الماي شح ما یوصلك

والدین ابدمك رویته

 

الشاعر جعفر عبدالمهدی العبادی

هوسات للکرار(من گد ما چبیر الصیت ) جعفر عبدالمهدی العبادی

سیل امدرعم الکرار من هد الخصم کفه

لعیون النبی المختار چم نار البطل طفه

من گد ما چبیر الصیت ما ینشاف البصفه

گطره اببحر الکرار کل اهل الصیت

 

حیدر قائد الصِنّاف واهل الصنف تدری ابهاي

لا تتبع سراب اوصیك والکرار عذب الماي

اخلیلك ربط تاریخ یبگه او هووس انته اویاي

صیت الصنّافه من حیدر

 

جعفر عبدالمهدی العبادی

 

قصیده لطمیه (منهو غیر حسین ) جعفر عبدالمهدی العبادی

منهو غیر احسین یستاهل دمع وانصبه اله

هذه ابن سید البریه الضحه کلشی ابکربله

 

هذه ابن حیدر علینه او هذ ابن طاها الرسول

اُمّه صدّیقه الشهیده أعني فاطمة البتول

منذبح ضامي یشیعه او رکّت ابصدره الخیول

یا بشر ما صب دمعته او یا گلب یتحمله

 

یا بشر یسمع مصابه او مصرعا یتصورا

ما ذهل فکرا اعله طفّه  او جننه امصاب الجرا

ینسلب من بعد چتله او حتی گطعوا خنصرا

منطبر طبره اعله طبره او ما شخص ینغر اله

 

منطبر یا وسفه زینب صعدت اعله التل تشوف

یا حبیبی احسین نادت ضجّه چانت بالطفوف

طایح احسین الشفیه او دارت اعلیه الالوف

نحره جاوبهه یزینب یختي باري العایله

 

ردّي یا زینب یخویه روحي لمیهه الحرم

خویه من الخیل هجّت ذوله ما عدهم شیم

لمّي باطفال الهواشم  من یحرگون الخیم

یختي أوصّیچ ابرقیه لا تضیع ابهل فله

 

ردت ابیا حال زینب تهوه بالبیده او تگع

ریت المثلث یخویه ابوسطت اگلیبی وگع

عمه یالسجاد اخبرک والدک نحره انگطع

یا عُظم های الرزیه  واشکبر هل مسئله

 

یا عظم های الرزیه الحلت إبـــآل الولي

سلبوا اشما  بالمخیم من ذهب واشما حُلي

حتئ ملخوهه التراچي او شتّموا حیدر علي

گیدوا کل الیتامه او تچوی حیل  السنسله

 

جعفر عبدالمهدی العبادی

متنوع هوسات اجتماعیات ونصیحه جعفر عبدالمهدی العبادی

بیت الما تچهبه الناس لو من ذهب بُـنـیـانه

لون امسکّر اعله الضیف گلّي اشینفع امکانه

اذا من طین دار ابهور  واحد یجمع اخوانه

أفضل من ذیچ المتروکه

 

دکثّر بالظلم یفلان  من العمداً ولك عسّر

حتي ایبین الموخوش وانشوف الصدگ خیّر

موشرط الکرم بفلوس لازم بالهله ایکثّر

واشما یعسر عچله ابداره

 

احنه الما نوطي الراس بس للخالق انهبّط

و احنه اهل الکلام الزین  مو للشین وانخبّط

طیر الصیت هوه الراد حَب اعله الچتاف ایحط

کل ما اهده ایرد اعلینه

 

لازم  بالحذاره  اتکون  ویّه  الما  یقدر  الطیب

شفت اشیاء من هالناس راس الطفل منهه ایشیب

 حگّه امفتّح اهوه العین  وکت الذي اینام الذیب

ما غمض خاف ایغدرونه

 

یالتزامط   آنه   وآنه   إلآنه   لازم   بالفعل

بالکلایف ویّه اخوتك توگف اتشیل الحمل

یا  حلاة الصعبه تصبح تنگلب کلش  سهل

من توگف بالنیبه اویاها

 

یاللي متزاعل انصحك یالله راضیهه إخوِتك

یاهو یفزع من تحشّم من یلبّي النخوِتك

هذه عید الله او اگلك لا تغرّك دِنیتك

هه اخوانك بالتضیج اتعین،، موش البرا

 

یا هله ابگوم الرفاگه او یاهله ابجیت هلي

صبّح العید اشحلاته او بیکم الهم ینجلي

الله یحفظکم یخوتي ابجاه ابوالحمله علي

والعیــــد بیکم یحلالي

 

الوکت  مو  خوش  صایر  و الخلگ  متبعّده

 والتریده إبــ نیّه بیضه اعلیك نیته امسوّده

المهم  بالخیر اشوفه اشما حصل منّه او سِده

    هذه آنه او هاذی اهیه اطباعي

 

الشاعر جعفر عبدالمهدی العبادی

 

قصیده عمودیه ( فرحة العید ابظهورک تکتمل) جعفر عبدالمهدی العبادی

فرحت العید ابظهورك تکتمل

وانته یالمهدي تلم کل الشمل

هسه مامش عید کلهه امطشرین

لا چبیر الباله فارق لا طفل

صح نبدل اثیابنه او نلبس جدید

ظاهراً، بالباطن الکل مشتعل

البیت من دون الابوا ایصبّح ضجیج

الوکح یربط یضل بیده او یحل

خییر الخلیته یوگف عالامور

قصة المیقات اجتنه او معتزل

لاکن ابیناتنه ایضل هالکلام

انته ترجع والوضع هم ینعدل

عیدك امبارک یمولانه الغریب

انته فرحتنه او املنه المنشتل

والامل خضر بعد بانت قصون

یعني بوجودك حیه او ماینچتل

ینطي رمضان الدرس بعد الصیام

عدنه یصبح عید وایدرکه العقل

واحنه نفرح کل سنه ابعید الأله

نصلح الچان اعله اخوته ابگلبه غل

عدنه تمهید المجیئك بالقلوب

والصعب بوجودك ایصبح سهل

للفرج عجّل یبوصالح تعال

فرحت العید ابظهورك تکتمل

 

الشاعر جعفر عبدالمهدی العبادی

ومضه لعید الفطر (لا تجی یا عید الحسن ما گال) جعفر عبدالمهدی العبادی

کریم الینوصف لازم کریم اخلاق

یکشخ بل هله ابملگه الذي ایشوفه

وک لا تجی یا عید الحسن ماگال

صباح العید صلا ابمسجد الکوفه

فاگد والده او حیدر علینه الراح

ولاکن مبتسم اي هذه معروفه

ما غندب ولا سد بابه یوم العید

بل تلگه الخلگ بمضیفه مصفوفه

أُسوتنه الحسن وإبنهجه دوم انسیر

یخسه الراد نترک دربه وانعوفه

 

الشاعر جعفر عبدالمهدی العبادی